नुवाकोटमा गोरु जुधाएर माघे संक्रान्ति मनाईंदै

तारुका–५ चन्दनीको बारीको पाटोमा यो वर्ष गोरु जुधाउन १५ हल दर्ता भएको माघे संक्रान्ति मेला व्यवस्थापन समितिका अध्यक्ष जनकरजा ढुङ्गानाले जानकारी दिएका छन् ।

मेलामा सहभागी गराउने गोरु पाल्ने किसानलाई अन्नपात तथा अण्डालगायतका दाना सहित दुर्घटना बीमा समेतको व्यवस्था गरिएको समितिले जनाएको छ । यस्तै, नुवाकोटको बेत्रावतीमा यो वर्ष पाँच हल गोरु जुधाईंदैछ । गोरु जुधाउने मेलालाई व्यवस्थित र सुरक्षित बनाउन ध्यान दिइएको आयोजक गोसाईकुण्ड युवा क्लबका अध्यक्ष सुरज लवटले जानकारी दिए ।

नुवाकोटमा गोरु जुधाउन थालिएको आधिकारीक तिथि मिति थाह नभए पनि यो दुई सय ५० वर्षभन्दा पुरानो मानिन्छ । पहिले–पहिले आ–आफ्नो टोल–टोलमा सीमित क्षेत्रमा गोरु जुधाएर मनोरञ्जन लिने गरिएको तारुका २०६१ सालबाट व्यवस्थित रूपमा एकस्थानमा गोरु जुधाउन थालिएको हो । यस्तै, बेत्रावतीमा भने २०६४ सालबाट व्यवस्थित रूपमा गोरु जुधाउन थालिएको हो ।