बिमललाई सान्त्वना दिन फुटबलरहरु टिचिङ हस्पिटलमा

फुटबल खेलाडी बिमल घर्ती मगर र उनको परिवारलाई सान्त्वना दिन फुटबलरहर शिक्षण अस्पताल महाराजगञ्ज पुगेका छन् । बिमलकी बहिनी मनिषाको बिहीबार नवलपारसीस्थित घरमा रहस्यमय तरिकाले ज्यान गएको थियो । मनिषाको शव पोस्टमार्टकका लागि काठमाडौंको शिक्षण अस्पताल ल्याइएको छ ।

बहिनी मनिषाको ज्यान गएको खबर पाएसँगै फुटबलर बिमल पनि शुक्रबार बेल्जियमबाट फर्किएका छन् । उनी विमानस्थलबाट सोझै शिक्षण अस्पताल महाराजगञ्ज पुगेका छन् । 

राष्ट्रिय फुटबल टिमका सदस्य तथा फुटबल पदाधिकारीहरु बिमल र उनको परिवारलाई सान्त्वना दिन शिक्षण अस्पतालमा भेला भएका हुन् । विमलका आफन्तहरु पनि शिक्षण अस्पताल महाराजगञ्जमा नै भेला भएका छन् 

बिमलकी बहिनी मनिषाको बिहिबार बेलुका आफ्नै घरमा रहस्यमय तरिकाले ज्यान गएको थियो । प्रहरीले अनुसन्धानका लागि भन्दै बिमलकी बहिनीको प्रेमीलाई पक्रेर अनुसन्धान गरिरहेको छ ।